Minjari, niyah dikowh waktu baanan deyng maglami-lami. Mag-ongkah siga, magdagan, magbola. Kaginis-ginisan ongkah-ongkah-siga. Lai siga magbahagih-bahagih siddi-siddi tumpukan-siga beteh na magmít.
Na, sinabu sigá na mag-ongkah-ongkah naan sih, samparuwahan ngongkah, samparuwahan sab ngandah-ngandah. Jari, niyah sab deyng mbal palamud sugah bulaug. Yuk-na, “Góm ndah-ta saga aa iti. Pakitalow-ta boh sigá magdaganan.”
Na jari, hilling tapetape nan, hilling dagdag tabulih. Yuk-siga, “Ilu na datuh ngambit kitabi! Nilinggih na kitabi leh baanan karatuan!”
Na, magtalowhan na sab baanan deyng. Magdaganan na siga supaya mba talinggih. Paragan na mameng, tinalow. Pagdagan-na, ya kabisa talow-na, lai tarugtul leh-na batu manunggul maka kók-na. Jari, lai iya busulan sabab bey pinakitalow leh saga deyng bulaug sih.
Na jari, deyng mameng tu ley numbung tag sultan-siga. Ya sumbung-na, lai iya karugtul ma batu maka lai kok-na busulan bey iya nidupang-dupang leh saga deyng naan sih.
Nitilow na iya leh sultan bang deyng ingga ya bey makitalow siga. Ya ling-na, tapetape maka dagdag tabulih bey makitalow siga.
Na deyng duwa tu sih, bey mba gih nituntutan, heya bowah-siga. Beteh heya bowah katambak atawa beteh bowah deyng lumahan.
Na sakali, lai na nuntut mameng. Ya tuntut-na, hangkan iya ley busulan, bey siga nipakitalow leh saga deyng-deyng naan sih.
Na ya hukuman sultan deyng, pagga landuh laat bowah-siga makitalow sidja, gom gih nipiyut na. Sohoh nipiyut ma mameng.
Na yuk deyng bowah-siga nipiyut nan, yuk-siga, “Anduh, daa sab pakittupun toongan bowah-kami lu. Sugah gantaun sab makainom kami boheh.”
Hangkan na sampey beteh naan bowah tapetape maka dagdag tabulih dikih-dikih toongan. Ya na itu bey hukuman sultan deyng ma siga. Sabab ya ngkon hinang bowah-siga makitalow sidja.
Pasalan deyng mameng sab, hangkan na sampey teh naan, ya lendoh-na taga busul.
