Saga Duwak ma Bud Bongao
Bey masa, maha gih niyah sattuwa duwak ma dunya.
Minjari, duwak tu bey paluwas min bangsa manusiyah. Ma dikowh lahat, niyah dikayuh magtowh-teyh-anak, heka anak-siga. Anak-siga tu, magsiddi-siddi palangey-na. Niyah hatul, niyah lengog, maka niyah du sab bulaug. Na jari, dikayuh anak bulaug sih, sowmul nggoh-na ngadjal, pasekot iya ngalengog. Ngamuh kinakan minsan mba gih tahak. Minsan du nihakaan leh nggoh-na mba gih tahak, amu-amu iya ngalogos sinohoh nisandukan.
Dikowh llow, yuk nggoh-na, “Anak, subey tahak na ba, boh kow buwanan-ku! Ngagad kow! Daa kow kalanduh lagak! Ndaun ba saga danakan-nu lu mba lengog. Ngagad sidja nihatulan. Boh kau tu, sowmul kitá ngadjal, ilu kow nagow-nagow sohoh nisandukan minsan mba gih tahak. Ná! Katoonan-nu ba - kinakan bang maha tahak, mba hap ssa-na nikakan. Makakaat bottong.”
Na ngalogos na peen anak-anak sohoh iya nisandukan. Maha peen iya bey nidulan, ley ligih atey-na. Ya hinang-na, ley tibuh-na nggoh-na. Ley sampak-na. Sampey ley gih daplosan-na. Apa maha iya bey nidulan nibuwanan kinakan.
Taka maka taka-na, astolan na nggoh-na ma anak-na. Iman maka sabal lai na laan. Sampey kasi-na ma anak naan sih, ley na lungey. Kabisa ligih atey-na, lai iya ngalah sanduk sih. Bohoh ya na pangandaplos-na ma anak-anak landuh bulaug sih.
Manjari, ya sanduk bey pangandaplos ma anak-anak sih, lai ngokkot ma baran-na sekot ni bulih. Ya na lai minjari tegol. Na jari, maha na makabissara anak-anak bulaug bey nidaplosan sih. Ya ngkon lapal paluwas min bowa-na, “Kre-kre-kre.” Ley iya maneyk ni diyatah hobong. Bey na nilinganan leh nggoh-na maka saga danakan-na sinohoh palobbos, sugah maha bey paruli-na.
Na jari, pagga beteh náan na kajarihan anak-anak sih, lai na iya palatun min lumah tudju ni kakayuhan maglatun-latun na. Na ya na itu tagnaan bey paniyah duwak ma diyalom dunya.
